《禾寮坑村謀殺案》
四年前嘅三月十七日，火炭禾寮坑村發生一宗謀殺案，一名六十歲男村民用錘仔扑殺同村另一名男村民，最終令該名男村民死亡。而兇手被落案起訴，最終法官將佢判處終身監禁。
本來呢單係一件普通嘅謀殺案，但法官宣佈判詞時侯，講咗一句令人感到困惑嘅說話。
「呢單案，無人知道案發時被告同事主嘅爭執同具體情況。但別無選擇下，唯有判處終身監禁。」
無錯，有份調查呢單案同涉案嘅人，都形容呢單案係「九唔搭八」，其實當中有一段鮮為人知嘅詭異內容。
我係其中一個有份到達現場嘅救護員，當日同另一個拍擋喺救護車Stand by時侯，收到電台Call，指出火炭禾寮坑村有人報警受傷求助，報稱比人襲擊。於是我同拍擋就正式出發。
禾寮坑村呢個地方應該係我地第一次入去，一落車後，整個環境好陰沉恐怖，燈光缺乏同埋寂靜得嚇人。通常如果有人報警，會有好多鄰居街坊會出嚟「睇戲」，但我地到場時侯一個人都無。
「地址係咩？」我問。
「51A村屋。」拍擋望望周圍說。我地一路急步走一路留意村屋嘅標示。
終於，我地搵到51A，同樣地，我地見到有個一個軍裝警，同埋有個伯伯坐咗喺村屋門口一張凳上面。咁我同拍擋即刻上前睇下佢。但我望一望佢，佢神情呆滯，身體上完全無任何明顯傷痕，於是我問：「伯伯，係咪你報警呀？」
當我問完後，伯伯擰個頭望住我，雙眼反白，一直沉默。呢下嚇到我同拍擋都呆咗，點解佢對隻會反白，非常恐怖。
我吞一吞口水，再問：「伯伯，你邊到唔舒服呀？」
只見伯伯一直雙眼反白咁望住我，成個人好似靜止咗咁，郁都唔郁。由於我地唔知發生咩事，我地都唔敢亂掂伯伯，剎那間大家都唔知點做好。
軍裝警就行埋嚟講：「我都係岩岩嚟到，佢一直都話比人打，無第二句。」
「送佢去醫院check check算喇。」拍擋問。各人都同意，於是準備帶伯伯起行離開。
突然間，個伯伯捉住我隻手，然後緊張大叫：「有人襲擊我呀！」
「我知我知，咁邊個打你？佢打你邊到呀？」我急問。
「我唔識佢，但佢係大陸人嚟架！佢用支棍打落我個頭到，我好痛呀……我個頭同心胸都好痛呀！」伯伯臉部表情顯得十分痛苦，於是我即刻檢查佢頭部同心胸，但完全無任何傷痕。
「伯伯，我睇唔到你有邊到傷呀！不如我送你去醫院檢查下先喇！」我好言相勸。
但伯伯唔肯放手，大大力捉緊我膊頭，然後指住眼前呢間村屋入面說：「唔好呀！我喺入面呀！」
我同拍擋連同軍裝警同步望住呢間屋，只見大門半開，屋內毫無燈光漆黑一片。軍裝警於是拔槍，慢慢一步一步走近間村屋，而我同拍擋頓時緊張起嚟。
當軍裝警入屋內幾十秒，然後出嚟同我地講：「你地入嚟睇睇。」
於是拍擋留喺到睇住伯伯，而我慢慢走到村屋入面。只見屋內有個男人瞓喺地下，全身都無著衫，而且有件衫笠住個頭。我即刻行埋去為佢睇睇，一睇之下發現個男人已經無呼吸脈搏，於是即時幫佢做心外壓同同心肺復甦，但無論我點做都好，個男人都毫無反應。
我望住軍裝警搖搖頭意示無得救，軍裝警即刻Call電台支援。
呢個時侯，我再檢查一下死者，留意到佢致命傷應該源於頭部，幾乎被硬物扑到凹哂，而四肢都有啲傷痕同埋變形，明顯有骨折情況。我同軍裝警先出去等等，然後軍裝警緊張地問個伯伯：「入面間屋個男人邊個嚟？你識唔識佢呀？」
「我唔知邊個打我呀！我就知我個頭好痛，你幫幫手救我喇！我唔想死呀！」
「我係問你入面個男人係邊個呀？同埋你根本就無事！」
「阿Sir幫幫我啦！我唔想死呀！救我呀！」伯伯不斷重覆呢一句，我同軍裝警互望下，覺得個伯伯精神可能有問題，於是等支援一拼送佢去醫院。
事後，軍裝警同我拍擋都形容伯伯「九唔搭八」，但相信兇手就係伯伯，於是草草咁完咗呢件案。
最後，當伯伯送上救護車，我正想關門開車時，我見到頭先間村屋門口企住個死者，我嚇到碌大對眼，然後伯伯突然又捉住我對腳，我望一望佢，伯伯話：「做咩唔送我去醫院？我係咪無得救？點解掉低我喺入面？」
我嚇到腳軟，但我拍擋好似唔知發生咩事咁，仲笑笑口同伯伯講：「呢家咪送你去醫院囉！」
我望一望村屋方向，只見一堆軍裝警調查，再無見到死者。
開車後，我坐返埋位，個心充滿不安感覺同有啲寒，因為我諗起伯伯頭先捉住我手同我講嘅說話，佢話「我喺入面」，「我」，係咪代表死者？
我嘗試將兇手說話當成受害者，成件事就唔再係「九唔搭八」了。
完
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
希望大家比like或share或多多留言給予支持
你地既like 就係我寫作動力～大家要瘋狂留言呀～
記得follow ig：https://www.instagram.com/homing0624/
Search